Deeq gargaar ah oo ay Imaaraadku ku taageerayaan dadka ay abaaruhu saameeyeen ayaa soo gaartay Muqdisho.

 

Markab ay leedahay dowlada Imaaradka Carabta oo sida raashin dhan kun tan ayaa barqanimadii ku soo xirtay dekadda Muqdisho.

Gargaarkan oo ay la wareegeen dowlada Soomaaliya, ayaa loogu tala galay in la gaarsiiyo dad tiradoodu gaareyso 2.5 milyan, oo ka mid ah Soomaalida ay sida daran abaartu u saameysay.

 Imaaradka Carabta ayaa dadaal weyn ugu jira sidii gargaar loo gaarsiin lahaa gobollada Soomaaliya ee ay saameeyeen abaaraha ka dhashay roob la’aanta saddex xilli oo xiriir ah.

Daneynta Imaaraadka ee xaaladda bini’aadantinimo ee dadka Soomaaliyeed waxa ay ku soo beegantay qaab dhismeedka hoggaanka u hanqal taagaya caawinta dhammaan dalalka walaalaha iyo saaxiibada ah iyo kor u qaadida awooddooda si ay u wajahaan xasaradaha bini’aadantinimo iyo yaraynta dhibaatooyinka ka dhalanaya.

Soomaaliya ayaa ka mid ah dalalka Geeska Afrika ee ay sida weyn u saameysay abaarta, taasoo dhibaato xooggan ku haysa kumannaan qof oo ay abaaruhu saameeyeen.

Hadaba Haddii aan la masuq maasuqin, qeybinta gargaarkan, ayaa kaalin muhiim ah ka qaadan doona gurmadka loo fidinayo dadka taabaaleysan.

Waa gurmadkii labaad ee ay  Imaaradka ku taageerayaan dadka ay abaaruhu saameeyeen, iyagoo hore u keenay deeq raashin ah oo gaareysay 572 tan.

Abaaraha dalka ka jira ayaa maraya meel halis ah, waxaana badanaya dadka abaaraha ka soo barakacaya, iyadoo ilaa iyo iminkana aan la heynin gargaar ku filan dadka ay abaaruhu halakeeyeen.